Arwain gwasanaethau cyhoeddus
Aelodau
Arweinyddion a phrif weithredwyr chwe chyngor y gogledd ynghyd ag arweinyddion lleyg a gweithredol y cyrff sy'n cynnig gwasanaethau pwysig eraill i bobl y rhanbarth yw aelodau Bwrdd Arwain Rhanbarthol y Gogledd:
- Cyngor Bwrdeistref Sirol Conwy
- Cyngor Sir Ddinbych
- Cyngor Gwynedd
- Cyngor Sir Ynys Môn
- Cyngor Sir y Fflint
- Cyngor Bwrdeistref Sirol Wrecsam
- Cadeirydd a Phrif Weithredwr Bwrdd Iechyd Prifysgol Betsi Cadwaladr
- Cadeirydd a Phrif Weithredwr Awdurdod Heddlu'r Gogledd
- Prif Gwnstabl Heddlu'r Gogledd
- Cadeirydd a Phrif Swyddog Tân Awdurdod Tân ac Achub y Gogledd
Sefydlu a diben
Cafodd y Bwrdd ei sefydlu yn 2010 gan ymgorffori Bwrdd Partneriaeth Ranbarthol y Gogledd oedd wedi'i sefydlu yn 2006 yn ymateb i Raglen 'Creu'r Cysylltiadau'.
Dyma oedd rôl Bwrdd Partneriaeth Ranbarthol y Gogledd:
- Rheoli a hybu prosiectau cydweithio fyddai'n profi ffyrdd o roi gwasanaethau ar y cyd lle byddai awdurdod arweiniol yn cynnig gwasanaeth ar gyfer mwy nag un cyngor.
- Lledaenu profiad a meithrin cysylltiadau i gryfhau'r cydweithio.
- Gweithredu'n 'Llais y Gogledd' gan ymgyrchu ynglŷn â materion o bwys i'r rhanbarth.
Yn sgîl partneriaeth, arwain – Bwrdd Arwain Rhanbarthol y Gogledd
Canolbwynt ar hyn o bryd
Nod Bwrdd Arwain Rhanbarthol y Gogledd ywarwain yn strategol er mwyn:
1. Hybu gwasanaethau mwy effeithlon trwy:
- Cynnig gwasanaethau ar y cyd.
- Lledaenu'r arferion gorau a newidiadau buddiol o ran rhoi gwasanaethau.
2. Cryfhau'r berthynas â gwasanaethau cyhoeddus eraill y rhanbarth megis Bwrdd Iechyd Prifysgol Betsi Cadwaladr, Heddlu'r Gogledd a Gwasanaeth Tân y Gogledd trwy ledaenu gwybodaeth, hyrwyddo gwell partneriaethau ymhlith gwasanaethau cyhoeddus a sefydlu trefniadau rhanbarthol ar gyfer cydweithio'n llwyddiannus ac yn arloesol ymhlith y gwasanaethau hynny.
3. Dylanwadu ar Lywodraeth Cymru a Llywodraeth San Steffan ynglŷn â materion rhanbarthol.
Delfryd
Mae'r Bwrdd wedi llunio delfryd arloesol ar gyfer hyrwyddo a hwyluso newidiadau yn y gwasanaethau cyhoeddus.
Hanfod y delfryd yw bod pob partner wedi ymrwymo i 'ddefnyddio cydweithio, a phartneriaethau arloesol eraill, i wella gwasanaethau a'u gwneud yn fwy effeithiol trwy rannu costau, arbenigedd a chyfleusterau TG a rheoli'r farchnad yn graffach trwy gomisiynu a chaffael ar y cyd'.
Gwireddu'r delfryd: Byrddau rhaglenni
Pedwar bwrdd rhaglenni rhanbarthol sy'n gyfrifol am wireddu'r delfryd:
- Gofal Cymdeithasol a Iechyd
- Addysg a Gwasanaethau Perthynol
- Gwasanaethau Amgylcheddol a Rheoleiddio
- Gwasanaethau Cymorth
Dyma fanylion bwrdd pob rhaglen ranbarthol:
- Aelodau: cynghorwyr a phrif swyddogion sy'n gyfrifol am y maes dan sylw, ynghyd â chynrychiolwyr partneriaid eraill Bwrdd Arwain Rhanbarthol y Gogledd.
- Gorchwyl: Llunio prosiectau cydweithio rhanbarthol fydd yn arbed adnoddau ac yn gwella gwasanaethau.
- Diben arall: Ymateb i ofyn gweinidogion i wella gwasanaethau ac arbed adnoddau yn y maes dan sylw, e.e. addysg a gwasanaethau cymdeithasol.
- Noddwr: Prif weithredwr sy'n atebol i Fwrdd Arwain Rhanbarthol y Gogledd ac yn ceisio gofalu bod pob bwrdd yn gweithio mewn modd uchelgeisiol, ymestynnol a phwrpasol.
Dyma rai prosiectau pwysig:
Bwrdd rhaglenni & Prosiect
Gofal Cymdeithasol a Iechyd
Canolfan gomisiynu ranbarthol ar gyfer gwasanaethau i blant, anableddau dysgu, iechyd y meddwl a lleoedd i'r rhai ac arnyn nhw anghenion cymhleth
Trefniadau comisiynu rhanbarthol ar gyfer Rhaglen 'Cefnogi Pobl'
Addysg a Gwasanaethau Perthynol
Trawsffurfio addysg trwy sefydlu gwasanaeth i'w rannu ar gyfer gwella ysgolion
Gwasanaethau Amgylcheddol a Rheoleiddio
Sefydlu gwasanaeth i'w rannu ym maes llunio adeiladau a gwasanaethau adeiladu
Rheoli cronfeydd cerbydau a gwasanaethau cludo
Gwasanaethau Cymorth
Rhannu gwasanaethau gweinyddu
Asiantaeth gaffael ranbarthol
Ffrydiau gwaith eraill
Mae'r Bwrdd yn ymwneud â ffrydiau gwaith eraill megis:
- Symleiddio partneriaethau yn y gogledd gyda chymorth Heddlu'r Gogledd a Bwrdd Iechyd Prifysgol Betsi Cadwaladr.
- Gwella'r cydweithio â'r GIG trwy ystyried yn rheolaidd adroddiadau Bwrdd Iechyd Prifysgol Betsi Cadwaladr, lle mae cynrychiolwyr yr awdurdodau lleol ymhlith aelodau'r bwrdd gweithredu.
- Ymgynghori â'r undebau llafur ynglŷn â materion cydweithio trwy gyfarfodydd cyswllt yn rheolaidd.
Problemau a'u datrys
Dyma rai gorchwylion ymestynnol mae Bwrdd Arwain Rhanbarthol y Gogledd yn eu hwynebu:
- Cael gafael ar y gallu a'r adnoddau ar gyfer prosiectau cydweithio.
- Gofalu ei fod yn cyfathrebu'n dda â phob cyngor a bod ei amryw raglenni a phrosiectau'n gwneud hynny, hefyd.
Argyhoeddi cynghorwyr a rheolwyr sydd ag amheuon y bydd cydweithio rhanbarthol yn:
- arbed adnoddau ac yn gwella gwasanaethau;
- yn hwyluso rheolaeth leol o hyd trwy drefniadau llywodraethu newydd.
I'r perwyl hwnnw, mae Bwrdd Arwain Rhanbarthol y Gogledd yn:
- Gweithio'n ddyfal i gyfleu'r hyn mae'n ei wneud trwy roi adroddiadau am hynt y byrddau rhaglenni gerbron cynghorau'n rheolaidd, cyhoeddi adroddiadau am brosiectau wrth eu sefydlu a hyrwyddo eu hargymhellion nhw, lledaenu cylchlythyrau/bwletinau a chysylltu trefniadau rheoli prosiectau a rhaglenni â'r rhwydweithiau proffesiynol perthnasol.
- Defnyddio cronfa drawsffurfio ranbarthol ac ynddi dros £1 miliwn i fuddsoddi mewn prosiectau a phenodi rheolwyr gwasanaethau rhanbarthol newydd gan fynnu iddyn nhw ddatblygu'r gwasanaethau hynny heb brosesau biwrocrataidd hirfaith.
- Arwain ac ymroi'n strategol.
- Ceisio gofalu y bydd buddion go iawn yn deillio o'r prosiectau presennol i ddangos bod cydweithio'n gallu llwyddo.
Mae rhagor o wybodaeth gan: Stephen Jones