Mae amddiffyniad yn erbyn gwahaniaethu ar sail rhywioldeb wedi ei gynnwys mewn perthynas â chyflogaeth a hyfforddiant o dan Reoliadau Cydraddoldeb Cyflogaeth (Cyfeiriadedd Rhywiol) 2003. Estynwyd yr amddiffyniad hwn o dan Reoliadau’r Ddeddf Cydraddoldeb (Cyfeiriadedd Rhywiol) 2007 i gwmpasu:
- darparu nwyddau, cyfleusterau a gwasanaethau
- gwaredu a rheoli adeiladau
- addysg
- ymarfer swyddogaethau cyhoeddus
Gan hynny bydd gan gorff sector cyhoeddus ddyletswydd i sicrhau nad yw gwahaniaethu tuag at bobl oherwydd eu cyfeiriadedd rhywiol yn digwydd, a hynny wrth ddarparu cyflogaeth a chyflwyno gwasanaethau i’r cyhoedd. Mae newid i ddulliau sy’n canolbwyntio ar y dinesydd, gydag ysgogiad newydd i herio gwahaniaethu sefydliadol mewn perthynas â chyfeiriadedd rhywiol, yn golygu bod rhaid i awdurdodau roi lle canolog i gydraddoldeb ac amrywiaeth. Dylent ymgysylltu â chymunedau sydd wedi eu hymylu neu sy’n anodd eu cyrraedd er mwyn cyflawni eu dyletswyddau o dan yr agenda cynllunio cymunedol a gwella.
Bydd cyflwyniad partneriaethau sifil (Deddf Partneriaeth Sifil 2004) ym mis Rhagfyr 2005 hefyd yn ei gwneud yn ofynnol i awdurdodau lleol addasu ac ymateb i’r agenda newydd hon. Yn wahanol i briodas, perthynas gyfreithiol yw partneriaeth sifil ar gyfer parau o’r un rhyw yn unig gan greu statws cyfreithiol partner sifil. Bydd y bartneriaeth yn caniatáu i barau o’r un rhyw gael cynabyddiaeth gyfreithiol ffurfiol i’w perthynas.
Stonewall Cymru: Hyrwyddwyr Amrywiaith Cymru
 |
Er 2006 mae Cymdeithas Llywodraeth Leol Cymru yn aelod o Raglen Eiriolwyr Amrywiaeth Stonewall, sy’n anelu at hyrwyddo cydraddoldeb i bobl lesbiaidd, hoyw a deurywiol yn y gweithle. I ddysgu mwy am y rhaglen cliciwch ar y ddolen we gyferbyn neu gweler y cyhoeddiadau cysylltiedig isod.
Canolfan Ragoriaeth LGBT: Y Marc Enfys
Yn ddiweddar mae’r Ganolfan Ragoriaeth LGBT a leolir y Abertawe, wedi datblygu a lansio’r Marc Enfys – marc cydraddoldeb a noddir gan Lywodraeth Cynulliad Cymru a’i gefnogi gan Gymdeithas Llywodraeth Leol Cymru a Thai Pawb. Mae’r Marc Enfys yn arwydd o arfer da, ymrwymiad a gwybodaeth am anghenion, ystyriaethau a rhwystrau penodol sy’n wynebu pobl lesbiaidd, hoyw, deurywiol, a thrawsrywiol (LGBT) yng Nghymru. Am fwy o wybodaeth am y Marc Enfys cliciwch yma
Mae rhagor o wybodaeth gan: Rob Beardall