Arian 'Trefi Taclus' i gynghorau Cymru
15 Mai 2008
Croesawodd WLGA heddiw y ffaith y bydd £3 miliwn ychwanegol ar gael i'r awdurdodau lleol dros dair blynedd ar gyfer prosiectau gwella'r amgylchedd.
Meddai Steve Thomas, Prif Weithredwr WLGA:
“Gall amgylchedd o ansawdd gwael effeithio'n fawr ar farn pobl am gyngor yr ardal. Gall effeithio ar fywyd y gymuned, hefyd – boed droseddau a diogelwch, adfywio neu iechyd a lles. Mae'r cynghorau'n effro i'r broblem ac yn gwneud eu gorau glas i wella byd pobl leol trwy wella'r amgylchedd. Yn wir, rhoes Cynllun Rhagoriaeth Cymru (cynllun cydnabod arferion da llywodraeth leol) glod i ryw hanner cynghorau Cymru fis Mawrth eleni am y modd maen nhw'n mynd i'r afael â materion amgylcheddol lleol megis cynlluniau a mentrau i leddfu'r newid hinsoddol a phrosiectau adfywio mawr ar gyfer cludiant cynaladwy, mannau agored ac ardaloedd trefol.”
“Nid cyfrifoldeb y cynghorau yn unig yw gwella'r amgylchedd, fodd bynnag. Mae angen gwneud hynny ar y cyd â phartneriaid eraill yn y sectorau cyhoeddus a gwirfoddol megis yr heddluoedd, Asiantaeth yr Amgylchedd ac Ymgyrch 'Cadwch Gymru'n Daclus'. Rhaid i'r cynghorau a'u partneriaid annog pobl i fod yn falch o'u cymunedau, cymryd rhan mewn cynlluniau ar gyfer rheoli gwastraff a derbyn peth cyfrifoldeb am amgylchedd eu bro.”
“Bydd yr arian ychwanegol yn helpu'r cynghorau i ychwanegu at y gwelliannau diweddar a buddsoddi ymhellach yn y materion sy'n bwysicaf i'w cymunedau. Mae'n dda gyda ni weld bod Llywodraeth y Cynulliad yn canolbwyntio ar yr un blaenoriaethau. Er ein bod yn croesawu rhagor o arian, fodd bynnag, rhaid ei ystyried yn fan cychwyn ar gyfer hel tystiolaeth o'r hyn mae angen ei wneud yn y pen draw i ddatblygu cymunedau diogel, cynaladwy a deniadol ledled Cymru. Fel y gwelliannau yn ein cymunedau, mae angen i drefniadau ariannu Llywodraeth y Cynulliad bara dros gyfnod maith.”
Jane Davidson, Gweinidog dros yr Amgylchedd, Cynaladwyedd a Thai gyhoeddodd y trefniadau ariannu ar gyfer tair blynedd.
Nodiadau i olygyddion
Grant 'Trefi Taclus': Dyraniadau'r awdurdodau lleol
| Awdurdod lleol | Dyraniad - £ |
| Ynys Môn | 87,806 |
| Gwynedd | 184,177 |
| Conwy | 104,071 |
| Sir Ddinbych | 103,032 |
| Sir y Fflint | 138,309 |
| Wrecsam | 121,073 |
| Powys | 214,958 |
| Ceredigion | 104,313 |
| Sir Benfro | 125,465 |
| Sir Gâr | 195,840 |
| Abertawe | 202,416 |
| Castell-nedd Port Talbot | 131,964 |
| Pen-y-bont ar Ogwr | 122,351 |
| Bro Morgannwg | 110,535 |
| Rhondda Cynon Taf | 210,192 |
| Merthyr Tudful | 49,047 |
| Caerffili | 153,235 |
| Blaenau Gwent | 61,103 |
| Tor-faen | 79,817 |
| Sir Fynwy | 87,278 |
| Casnewydd | 124,522 |
| Caerdydd | 288,496 |
| Cyfanswm | 3,000,000 |