Rhoi'r wybodaeth iawn i'r bobl iawn ar yr adeg iawn yw swyddogaeth hanfodol y Swyddfa yng ngoleuni'r ffaith bod digon o wasanaethau gwybodaeth ar gael ar gyfer amryw sectorau a pholisïau. Mae Swyddfa Ewropeaidd WLGA yn 'siop unstop' i awdurdodau lleol Cymru ynglyn â materion a datblygiadau Ewropeaidd.
Dyma brif negeseuon y Swyddfa o ran cyflawni:
Rhoi blaenoriaeth i'r cwsmeriaid
Bydd y Swyddfa yn cwrdd â staff yr awdurdodau lleol fel bo'n briodol ac yn meithrin amgyffred manwl o'r blaenoriaethau a'r prosiectau sydd o ddiddordeb iddyn nhw. Fel hyn, bydd y Swyddfa o gymorth gwerthfawr i WLGA a'r awdurdodau lleol trwy roi gwasanaeth i ddiwallu anghenion penodol byd llywodraeth leol.
Deall anghenion y cwsmeriaid
Mae anghenion byd llywodraeth leol ynghylch materion Ewropeaidd yn hollbwysig a bydd angen gwasanaeth mwy atebol ar awdurdodau lleol Cymru. I hwyluso hynny, bydd Swyddfa Ewropeaidd WLGA yn mynychu cyfarfodydd swyddogion materion Ewropeaidd ledled Cymru ac achlysuron eraill byd llywodraeth leol lle mae materion o'r fath yn ganolbwynt. Mae'r Swyddfa Ewropeaidd yn cydweithio'n agos â swyddogion polisïau ac ymgynghorwyr WLGA i feithrin gwell amgyffred o anghenion byd llywodraeth leol.
Rhagweithredol ac ymatebol
Mae nifer o faterion Ewropeaidd lle bydd y Swyddfa'n defnyddio dull rhagweithredol - fel sydd wedi'i amlinellu yn ein blaenoriaethau ynghylch polisïau. Bydd angen bwrw golwg ar y blaenoriaethau hynny yn rheolaidd wrth fod yr Undeb Ewropeaidd yn datblygu. At hynny, mae'n bosibl bydd rhai awdurdodau am gael gwybodaeth am feysydd ychwanegol ambell waith ac, os digwydd hynny, bydd WLGA yn ymateb i'ch cais.
Gwasanaethau ymarferol
Bydd Swyddfa Ewropeaidd WLGA yn gofalu ei bod yn cynnal gwasanaeth cyflawn ar gyfer rhoi gwybodaeth ymarferol i'r awdurdodau sy'n perthyn i'r Gymdeithas. I'r perwyl yma, byddwn ni'n:
- Ceisio dylanwadu ar sefydliadau a hoelion wyth yr Undeb Ewropeaidd a hybu polisïau WLGA yn eu plith. Rhoi cymorth ynghylch llunio polisïau a gwaith dylanwadu;
- Hwyluso cyfathrebu ynglyn ag anghenion byd llywodraeth leol, argymhellion ac ymatebion i hoelion wyth yr Undeb Ewropeaidd;
- Rhoi gwybodaeth am gynlluniau ariannu;
- Casglu gwybodaeth am ddeddfwriaeth a phroses llunio polisïau ar gyfer WLGA ac awdurdodau lleol Cymru;
- Datblygu a chynnal cysylltiadau agos â sefydliadau Brwsel, cynrychiolwyr rhanbarthol a chymdeithasau eraill Ewropeaidd.
Bod yn hyblyg
Bydd y Swyddfa'n gweithio'n hyblyg er mwyn rhoi'r gwasanaeth mae'i angen ar fyd llywodraeth leol Cymru ynglyn â materion Ewropeaidd.
Mae rhagor o wybodaeth gan: Iwan Williams