Cyfarwyddwyr Diogelu'r Cyhoedd Cymru (DPPW) yw cylch y swyddogion sy'n arwain gwasanaethau diogelu'r cyhoedd yn yr awdurdodau lleol. Dyma ddatganiad y cylch o'i ddiben:
'Diogelu lles personol, amgylcheddol, economaidd a chymdeithasol trwy bolisïau, rheoleiddio ac addysg. Trwy'r dulliau hynny, rydyn ni am ofalu bod modd byw a gweithio'n ddiogel yn y cymunedau rydyn ni'n eu gwasanaethu.'
Mae gwasanaethau diogelu'r cyhoedd yn cynnwys pob agwedd ar drwyddedu, iechyd yr amgylchedd a safonau masnach. Mae gyda ni ddau gylch ar gyfer penaethiaid gwasanaethau – Penaethiaid Iechyd yr Amgylchedd Cymru a Phenaethiaid Safonau Masnach Cymru. Yn y ddau gylch, mae amryw baneli arbenigol a thechnegol a phwyllgorau dros agweddau cyffredinol megis hyfforddi, gorfodi a rheoli perfformiad. Mae cynrychiolwyr gyda ni mewn amrywiaeth eang o ffora, cylchoedd cynghori a phwyllgorau llywio, hefyd.
Adroddiad am wahardd smygu yng Nghymru
Cyflwynodd Cyfarwyddwyr Diogelu Cyhoedd Cymru (DPPW) eu hadroddiad diweddaraf, ‘Gwahardd smygu yng Nghymru: Rôl gwasanaethau’r awdurdodau lleol ynghylch diogelu’r cyhoedd’ yn ystod Cynhadledd Sefydliad Siartredig Iechyd yr Amgylchedd yng Nghaerdydd ar 25ain Chwefror 2009.
Yn ôl pob tebyg, gwahardd smygu mewn mannau cyhoeddus dan do yw’r cam mwyaf arwyddocaol ym maes iechyd y cyhoedd yng Nghymru dros y 50 mlynedd diwethaf. Mae cydnabyddiaeth hefyd ei fod wedi’i gyflwyno’n llwyddiannus iawn oherwydd, yn bennaf, y cydweithio ardderchog rhwng cyrff llywodraeth wladol a lleol a’r adnoddau priodol i’r awdurdodau lleol.
Mae canran y rhai sy’n smygu yng Nghymru yn annerbyniol o uchel o hyd, fodd bynnag. Er bod gwahardd smygu wedi ysgogi rhai pobl i roi’r gorau iddo neu gwtogi arno, mae eisiau rhagor o waith i fynd i’r afael â bygythiad sy’n dal ymhlith y rhai mwyaf peryglus i iechyd pobl Cymru. Mae’r adroddiad hwn yn cydnabod sut mae gwasanaethau rheoleiddio’r awdurdodau lleol wedi cyfrannu yn barod ac yn nodi camau ychwanegol a allai – ac, mewn rhai achosion, a ddylai – gael eu cymryd i helpu i ostwng canran y rhai sy’n smygu eto fyth.
Bydden ni’n croesawu’ch sylwadau am yr adroddiad hwn a’i argymhellion. Anfonwch nhw at Jane Shepherd, Swyddog Polisïau WLGA dros Wasanaethau Rheoleiddio.