Ffoaduriaid a phobl sy'n gofyn am loches yng Nghymru

Yn 2001, pennodd Llywodraeth San Steffan rai ardaloedd ar gyfer cartrefu'r rhai sy'n gofyn am loches yn y DG.

Mae ardaloedd pedwar o awdurdodau lleol Cymru ymhlith y rheiny ac mae rhai pobl sy'n gofyn am loches yn mynd i ganolfannau'r gwasanaeth gwladol ar eu cyfer yn:

• Caerdydd
• Casnewydd
• Abertawe
• Wrecsam

Mae awdurdodau lleol y pedair ardal uchod yn gyfrifol am roi gwasanaethau a llety ar gael i'r rhai sy'n gofyn am loches a rheoli modd eu cymathu yn y fro.

Mae'r Swyddfa Gartref yn cyhoeddi ystadegau am nifer y ceisiadau am loches bob tri mis. Mae'r wybodaeth yn cynnwys y prif dueddiadau yn y ceisiadau, y penderfyniadau cyntaf a'r apeliadau, nifer y ceiswyr ym mhob rhan o'r DG a'u nodweddion demograffig. Dyma ddolen â'r dudalen berthnasol ar wefan y Swyddfa Gartref.

Dyma nifer y rhai oedd yn gofyn am loches, a'u dibynyddion, yn y pedair ardal honno fis Mehefin 2008

Ffynhonnell: Y Swyddfa Gartref (Mehefin 2008).

Mae 0.3% o boblogaeth Cymru yn ffoaduriaid a phobl sy'n gofyn am loches

Cyd-destun y polisi yng Nghymru

Er nad yw materion mewnfudo ymhlith cyfrifoldebau Llywodraeth y Cynulliad, mae gwasanaethau cyhoeddus megis addysg, tai a iechyd wedi'u datganoli ac, felly, mae Llywodraeth y Cynulliad yn cyflawni rôl allweddol ynghylch helpu ffoaduriaid a'r rhai sy'n gofyn am loches yng Nghymru. Ar 17eg Mehefin 2008, cyhoeddodd Llywodraeth y Cynulliad ei strategaeth am ffoaduriaid sy'n amlinellu sut bydd yn eu helpu i ymgartrefu yng Nghymru a chyfrannu'n llawn i'r gymdeithas yma. Ar ben hynny, mae'n nodi'r cynnydd hyd yma ynghylch cymathu ffoaduriaid yn y wlad. Mae modd codi copi o'r strategaeth yma.

Un o nodweddion eraill dull unigryw Cymru o drin a thrafod ffoaduriaid a'r rhai sy'n gofyn am loches yw bod gofal iechyd ar gael yn rhad ac am ddim o hyd i'r rhai mae'u ceisiadau wedi'u gwrthod. Cyflwynodd y Cynulliad reoliadau fis Medi 2004 i godi tâl am ofal eilaidd (ac eithrio triniaeth mewn adrannau damweiniau ac argyfyngau) ar y rhai wedi'u gwrthod ond penderfynodd Gweinidog y Cynulliad dros Iechyd a Gwasanaethau Cymdeithasol, Edwina Hart, ei gynnig yn rhad ac am ddim fis Mai 2008 yn sgîl achos yn yr Uchel Lys fis Ebrill 2008 a adawodd gryn ansicrwydd am hawliau'r rhai mae'u ceisiadau am loches wedi'u gwrthod ynghylch defnyddio gwasanaethau'r GIG yng Nghymru a Lloegr. Mae Adran Iechyd San Steffan yn mynd i'r gyfraith eto i fynnu na ddylai gwasanaethau'r GIG fod ar gael yn rhad ac am ddim i'r garfan hon.

Mae rhagor o wybodaeth am ymdrechion Llywodraeth y Cynulliad i helpu ffoaduriaid a'r rhai sy'n gofyn am loches yng Nghymru ar ei gwefan.

Mae mudiadau megis Cyngor Ffoaduriaid Cymru, sy'n rhan o 'Gwlad i mi a gwlad i ti', wedi croesawu'r penderfyniad i roi gofal iechyd yn rhad ac am ddim i'r rhai mae'u ceisiadau am loches wedi'u gwrthod. Yn ystod y cyfnod cyn yr etholiadau lleol fis Mai 2008, cynhaliodd 'Gwlad i mi a gwlad i ti' rai gweithgareddau i ofalu y byddai'r ymgyrchu gwleidyddol yn cryfhau cymunedau yn lle eu rhwygo. Mae rhagor o wybodaeth ar wefan y mudiad yma.

Cewch chi ragor o wybodaeth am ffoaduriaid a'r rhai sy'n gofyn am loches yng Nghymru trwy gysylltu â'r mudiadau isod:

Cyngor Ffoaduriaid Cymru

Mae Cyngor Ffoaduriaid Cymru yn elusen annibynnol sy'n galluogi ffoaduriaid a'r rhai sy'n gofyn am loches i gael eu traed tanyn nhw yng Nghymru. Mae'n rhoi cyngor, gwybodaeth a chymorth i ffoaduriaid a'r rhai sy'n gofyn am loches trwy ei swyddfeydd yng Abertawe, Caerdydd, Casnewydd a Wrecsam. 

Partneriaeth Ymfudo Strategol Cymru

Consortiwm Ffoaduriaid, Ceiswyr Lloches ac Ymfudwyr Cymru gynt.

Er mis Ebrill 2007, mae'r cyfungyrff rhanbarthol wedi'u troi'n bartneriaethau dros ymfudo strategol am eu bod yn gyfrifol am weithwyr ymfudol bellach yn ogystal â ffoaduriaid a'r rhai sy'n gofyn am loches. Maen nhw'n cymryd rhan flaengar yn y maes hwn trwy gydweithio ag amryw bartneriaid yn y sectorau statudol, gwirfoddol a chymunedol i lunio polisïau a mentrau strategol ar gyfer ffoaduriaid, gweithwyr ymfudol a'r rhai sy'n gofyn am loches.

Pobl Wedi'u Dadleoli ar Waith

Mae'r mudiad hwn yn rhoi cyfle i ffoaduriaid a'r rhai sy'n gofyn am loches gyflawni gwaith gwirfoddol yn y gymuned fel y gallan nhw dreulio eu hamser mewn modd ystyrlon a diddorol.

Llais Ffoaduriaid Cymru

Mae Llais Ffoaduriaid Cymru yn fudiad ymbarél sy'n cynrychioli mudiadau cymunedau'r ffoaduriaid yng Nghymru.